CD 30 joar ADR

Op verzeuk van väöl Zjwamer luuj en natuurlik auch van ôszelf is ’t d’r noe den eindelik van gekômme: ooze eerste CD is vanaaf vandaag te kaup! Veur höbbe ’t aafgelaupe jaor ruum de tied genaome ôm te bekieke welke nummers veur op de CD wôlle höbbe: zie môtte natuurlijk kinmerkend zin veur oos kepel, mer det moog neet beteikene det d’r gein nuuj sjtökker op moge kômme. Nao oetgebreid sjtumme, insjpele, nog ins euverligke en tig keer verangere höbbe veur gekaoze veur 15 nummers die passe biej os: ein kepel die hilt van joeks en plezier, mer häör rippertwaar neet beperk toet de gebroekelikke joekskepellemeziek.

Geur vindjt op oos CD besjlis veur idder get wils: bekinde nederlandstalige hits wiej "Ik heb de zomer in mijn bol" of "Leef als een zigeuner", aafgewisseld mit zomerse klanke wie "Samba Cumba" of "Espana por favor". Vastelaoveshits wiej "In d’n hiemel" en "Zjwamer landj", mer netuurlik auch ooze classics wiej "Sweet Caroline" en de "Tiger Rag". 

Veur zin greuts op ’t eindresultaat en veur dinke det det auch veur uch zal gelje. De CD is te kaup veur € 7,50 biej Juul Keunings, mer wach neet te lang: de oplage is beperk!